使用條款 | 私隱政策

巨富派開工利是$20 員工:慳返個利是封吧

照片由報料讀者提供

某位香港大企業之首,初五派開工利是得廿皮,惹嚟扮工友大吐苦水。

 

打工仔放完新年假,大部份未回魂,若然收到封銀碼令人醒神嘅開工利是,仲爽過食早晨全餐。不過有人收到嘅開工利是,就連早晨全餐都買唔起。

 

我哋收到報料,某位貴為香港大企業之首嘅巨富,

年初五向員工派嘅開工利是,入面只得廿蚊。

今時今日百物騰貴,莫講話早餐買唔起,

員工自己派畀屋企樓下個看更呀,都唔止呢個價啦!

難怪報料扮工友話,不如慳返個利是封吧啦!結果一班員工條氣唔順,朝早開工都冇乜心機。

 

大家開工利是又係幾多呢?你哋都嫌$20太少?

等小編講多兩個殘酷現實過你哋知。

 

1)翻查資料,呢位巨富接受傳媒訪問時,屢屢表示最重視員工,話員工係公司最大資產,又話遇到敬業同勤奮嘅員工呢,一定要留住佢。嘩,到底係有人講心唔講金,定係講一套做一套?

 

2)小編即時幫你哋比較返市面上開工利是,大部份都係$50-$100,某傳媒機構有$300,某建造業公司有$500,而最高嘅大機構係 「海馬公園」,有$1200!!!

即係話人哋逗一年,等於你逗60年呀!

逗到你退休都唔夠人哋收一封,問你死未?

唔好死住。再諗吓「海馬公園」同巨富企業集團業績,你話邊個高啲?

 

其實開工利是都係老闆對員工心意,攞個意頭,唔似去飲做人情,冇話公價,又冇話老奉要畀,畀得少都好難怪老闆啲乜。不過如果封利是令到員工醒神,做嘢爽手啲,簽多幾張單,湊多幾個客,最後咪又係公司得益!

講開有錢佬派開工利是,小編就聽過麥玲玲話,富商呀老闆呀畀嘅利是最好儲起幾年,沾有錢人嘅運氣聚財。如果你嫌咁樣太迷信,捐出去行善積德,幫吓有需要人士都唔錯。至於向我哋報料嘅扮工友,就夾埋其他幾個員工嗰$20,走去買下午茶仲要幾份人分一杯凍OT~

無論開工利是多與少,都係攞個意頭。利是唔多,就努力工作,喺花紅度搵返吧!

小編都喺度祝大家開工大吉!工作順利!

 

【相關搜尋】開工利是幾時拆

最近的19+幾樣野

【熱話】香港金融業漸漸夕陽

【扮工收風】大學秘書被老點執倉 憤然辭職

【扮工收風】施政出爐 地產經紀又贏

【熱話】在職媽媽的辛酸

【扮工收風】上司控訴外籍同事「睇唔起黃皮膚」

【熱話】的士司機過海怨氣大

【扮工收風】酒店業歡迎退休人士「入行」

【扮工收風】霸氣老闆逼員工銷假退機票

【扮工收風】你有無同事經常推job

保安未必怕失業